fbpx

MMR birtir reglulega niðurstöður úr könnunum sem unnar hafa verið meðal almennings um málefni líðandi stundar. Kannanirnar eru jafnan unnar sem hluti af spurningavagni MMR og efnistök valin af starfsfólki MMR út frá þeim fréttum sem eru áberandi í umfjöllun þegar viðkomandi könnunin hefst. MMR birtir ekki fréttatilkynningar úr könnunum sem eru unnar fyrir aðra eða fjármagnaðar af öðrum.

 

Sjálfstæðisflokkurinn mældist stærsti stjórnmálaflokkurinn á Alþingi með stuðning 23,9% landsmanna samkvæmt könnun MMR sem framkvæmd var dagana 13.-19. apríl. Píratar mældust annar stærsti stjórnmálaflokkurinn á Alþingi með 15,3% fylgi og bæta við sig 2,1 prósentustigum frá síðustu mælingu sem lauk 19. mars síðastliðinn. Vinstri græn mældust á svipuðum slóðum og í síðustu mælingu og fá 14,3% fylgi. Samfylkingin tapar 2,5 prósentustigum milli mælinga en Flokkur fólksins bætir við sig 3,3 prósentustigum.

Stuðningur við ríkisstjórnina mældist 53,1%. Stuðningurinn dalar eilítið frá síðustu mælingu þegar 55,2% kváðust styðja ríkisstjórnina.

|

Meirihluti landsmanna segist andvígur því að leyfa birtingar áfengis- og tóbaksauglýsinga samkvæmt könnun MMR sem framkvæmd var í janúar. Rúmlega 60% svarenda sögðust andvíg því að áfengisauglýsingar væru heimilaðar en þar af sögðust tæp 42% vera mjög andvíg því. Stuðningur við heimilun áfengisauglýsinga var 18%. Athygli vekur að afstaða virtist nokkuð breytileg eftir kyni og aldri en karlmenn sögðust hlynntari birtingu slíkra auglýsinga en konur, auk þess sem andstaða gegn þeim jókst með aldri.

|

Sléttur helmingur landsmanna segjast fylgjandi banni á umskurði ungra drengja samkvæmt nýrri könnun MMR sem lauk í dag. Landsmenn virðast hafa nokkuð sterkar skoðanir á málinu og sést meðal annars helst á því að 68% svarenda höfðu algerlega öndverða skoðun á málinu, það er sögðu að þeir væru annað hvort mjög fylgjandi banninu (39%) eða sögðust mjög andvíg umskurnarbanni (29%). Þá voru 11% sem sögðust banninu frekar fylgjandi, 8% sögðust banninu frekar andvíg og 13% svarenda skipuðu sér á hlutleysisbekk í málinu og kváðust hvorki vera fylgjandi né andvíg banni við umskurði ungra drengja. Þá vekur athygli að öndverð afstaða til málsins virðist ganga þvert á flesta stjórnamálaflokka þannig að segja má að þjóðin sé pólitískt séð klofin í málinu.

|

Samkvæmt nýrri bílakaupakönnun MMR hefur fjöldi þeirra sem kjósa helst að eignast rafmagnsbíl aukist verulega á síðustu árum. Samkvæmt könnuninni voru 42% þeirra sem hugðust kaupa sér nýjan bíl (ekki notaðan) innan þriggja ára sem vildu helst að bíllinn væri knúinn rafmagni sem aðal orkugjafa. Þetta er ríflega tvöföldun frá árinu 2015, þegar 20% þeirra sem íhuguðu kaup á nýjum bíl sögðust helst vilja rafmagn sem aðal orkugjafa. Á sama tíma hefur eftirspurn eftir diesel knúnum bifreiðum minnkað stórkostlega og fellur úr 47% í 28% milli ára.

|

Stór hluti Íslendinga eða heil 71% landsmanna, segjast vera með Costco aðildarkort. Af þeim sem kváðust vera með Costco aðildarkort hugðust 60% endurnýja kortið þegar þar að kæmi en 35% eru óákveðin og 6% hyggjast ekki endurnýja aðild.

|

Sjálfstæðisflokkurinn mældist með með stuðning 22,3% landsmanna og er stærsti stjórnmálaflokkurinn á Alþingi samkvæmt nýrri könnun MMR sem framkvæmd var dagana 25-30. janúar. Fylgi Sjálfstæðisflokksins dregst þó saman um 3,5 prósentustig frá síðustu mælingu sem lauk 17. janúar. Vinstri græn mældust með 18,4% fylgi og bæta við sig 3,4 prósentustigum milli mælinga. Samfylkingin mældist nú með 14,9% fylgi og bætir við sig einu prósentustigi milli mælinga.

Stuðningur við ríkisstjórnina dalar milli mælinga en 60,6% sögðust styðja ríkisstjórnina nú samanborið við 64,7% í síðustu mælingu í janúar og 66,7% í desember 2017.

|

Mikil ánægja var á meðal landsmanna með Áramótaskaupið 2017 en heil 76% þátttakenda í könnun MMR, sem framkvæmd var dagana 9-17. janúar 2018, sögðu Áramótaskaupið hafa verið gott. Frá því að MMR hóf að mælingar á ánægju með Áramótaskaupið árið 2011 hefur ánægjan aðeins einu sinni mælst meiri eða 81% árið 2013. Aðeins 10% kváðu Áramótaskaupið 2017 hafa verið slakt en óánægja með Skaupið mældist mest árið 2012 þegar 48% sögðu það hafa verið slakt.

|

Þeim heldur áfram að fækka sem borða skötu á Þorláksmessu. Þetta leiðir ný könnun MMR á jólahefðum landsmanna í ljós. Alls voru 34,5% sem sögðust ætla að borða skötu í dag, Þorláksmessudag, sem er fækkun um eitt og hálft prósentustig frá því í fyrra og 7,6 prósentustiga fækkun frá því tíðni skötuáts náði hámarki í mælingum MMR árið 2013.

|

Íslendingar ríghalda í hangikjötshefðina og segjast 72% þeirra ætla að borða hangikjöt á jóladag í ár. Þetta sýna niðurstöður könnunar MMR sem fram fór dagana 12-15. desember. Helsta breytingin sem hefur orðið á undanförnum árum varðandi matarvenjur á jóladag er að nú sögðust heil 3,2% ætla að hafa grænmeti sem aðalrétt - sem er töluverð breyting frá árinu 2010 þegar ekki nema 0,6% sögðust ætla að borða grænmetisfæði á jóladag. Tæp 4% landsmanna ætla að borða kalkún, rúm 3% lambakjöt (annað en hangikjöt) og tæp 2% nautakjöt.

|

Á aðfangadag mun stór hluti, eða 47%, landsmanna gæða sér á hamborgarhrygg. Þetta sýnir könnun MMR sem framkvæmd var dagana 12-15. desember. Næst vinsælasti jólamatur landsmanna er lambakjöt (annað en hangikjöt) en 13% munu að sögn gæða sér á því. Kalkúnn eða rjúpur verða á borði rúmlega 8% landsmanna hvort um sig, 5% ætla að borða nautakjöt og um 3% önd. Tæplega 15% munu hafa aðra rétti en fyrrgreinda á boðstólnum á aðfangadag.

Nokkur aukning reyndist á fjölda þeirra sem ætla að borða lambakjöt (annað en hangikjöt) á aðfangadag, eða um rúm 3 prósentustig. Breytingar á fjölda þeirra sem hyggjast borða aðra rétti reyndust óverulegar og ljóst að hefðir og venjur skipta miklu máli þegar kemur að vali á veisluföngum á aðfangadag.

|

Líkt og undanfarin ár verða gervijólatré töluvert algengari á heimilum landsmanna um jólin heldur en lifandi tré. Litlar breytingar virðast hafa orðið á jólatrjáahefðum frá því í fyrra. Í ár sögðust 54,8% svarenda ætla að hafa gervitré og 32,3% lifandi tré en 13% munu ekki setja upp neitt jólatré á heimili sinu í ár.

|

Æ færri landsmenn senda jólakort til vina, ættingja og/eða vandamanna með bréfpósti. Þetta sýnir nýleg könnun MMR sem framkvæmd var dagana 12-15. desember. Í ár munu 41.7% landsmanna senda jólakort með bréfpósti samanborið við 45,1,3% í fyrra og 56,3% árið áður. Á sama tíma fjölgar þeim sem eingöngu senda rafrænt jólakort en 13,1% segjast munu senda rafrænt jólakort í ár, samanborið við 11,5% í fyrra og 10,7% árið áður.

Þeim fjölgar jafnframt sem ekki senda jólakort en 45,2% kváðust ekki ætla að senda jólakort í ár. Þetta er aukning um tæp 2 prósentustig milli ára og aukning um rúm 12 prósentustig frá árinu 2015.

|

Sjálfstæðisflokkurinn mædist með með stuðning 23,2% landsmanna og þar með stærsti stjórnmálaflokkurinn á Alþingi samkvæmt nýrri könnun MMR sem framkvæmd var dagana 12-15.desember. Samfylkingin og Vinstri græn mælast nokkurn vegin jafn stór, með tæplega 17% fylgi, en Vinstri græn bæta við sig 3,7 prósentustigum frá því í síðustu könnun sem lauk þann þann 17. nóvember síðastliðinn. Píratar bæta við sig 4,2 prósentustigum milli kannana og Flokkur fólksins tapar 4,7 prósentustigum.

Mikil og almenn ánægja mældist meðal landsmanna með nýja ríkisstjórn Vinstri grænna, Sjálfstæðisflokks og Framsóknar en 66,7% þeirra sem tóku afstöðu sögðust styðja ríkisstjórnina. Þetta er meiri stuðningur en nokkur ríkisstjórn hefur notið frá hruni og ekki síst merkilegur fyrir þær sakir að mun færri, eða rúm 48%, segjast myndu kjósa ríkisstjórnarflokkana.

|

MMR stóð í ár, líkt og undanfarin tvö ár, fyrir vinsældakosningu íslensku jólasveinanna. Kertasníkir reyndist hlutskarpastur þriðja árið í röð og heldur titlinum "Uppáhalds jólasveinn Íslendinga" með 30% tilnefninga. Sú breyting hefur aftur orðið frá fyrra ári að sérlegum aðdáendum Stúfs hefur fjölgað nokkuð, úr 24% í 29% og munar því ekki nema einu prósentustigi á vinsældum bræðranna tveggja. Hurðaskellir var líkt og fyrri ár í þriðja sæti með 13% tilnefninga.

|

Þeim fækkar stöðugt ökumönnum sem tala í farsíma án handfrjáls búnaðar. Samkvæmt könnun MMR voru 47% Íslendinga sem sögðust hafa talað í farsíma undir stýri án handfrjáls búnaðar á síðastliðnum 12 mánuðum en það er 9 prósentustiga fækkun frá sömu könnun fyrir ári síðan. Á móti hefur fjöldi þeirra sem tala í farsímann með handfrjálsum búnaði aukist nokkuð og stendur nú í 44%.

|

Þeim Íslendingum fækkar sem aldrei hafa notað tónlist, sjónvarpsefni eða kvikmyndir sem hefur verið hlaðið niður af deilisíðum. Þannig voru 44% Íslendinga sem aldrei hafa notað efni sem hefur verið hlaðið niður með slíkum hætti, samanborið við 50% árið 2015 í könnun MMR. Auk þess kom í ljós að fólk á aldrinum 18 - 29 ára reyndist líklegasti aldurshópurinn til að nota efni sem hlaðið hefur verið niður af deilisíðum.

|

MMR birti reglulega niðurstöður úr könnunum á fylgi flokkanna sem buðu fram fyrir nýliðnar Alþingiskosningar og var hin síðasta birt þann 27. október 2017. Heild voru meðalfrávik frá raunfylgi flokkanna 1,2 prósentustig. Það er, að meðaltali munaði 1,2 prósentustigum á atkvæðahlutfalli flokkanna í könnuninni og kosningunum. Munurinn reyndist eitt prósentustig eða minna hjá 7 flokkum af 11 sem buðu fram (þ.e. Vinstri grænum, Samfylkingu, Miðflokki, Framsóknarflokki, Bjartri framtíð, Alþýðufylkingu og Dögun). Mestur var munurinn á fylgi Sjálfstæðisflokks þar sem skeikaði 4,0 prósentustigum, sem skýrist að einhverju marki af því að hve Sjálfstæðisflokkurinn nýtur hlutfallslega mests stuðnings meðal eldri kjósenda sem gegnumsneitt eru líklegri til að skila sér á kjörstað. Í tilfelli annarra flokka, þ.e. Pírata, Viðreisnar og Flokks fólksins reyndist munurinn á bilinu 1,4-2,5 prósentustig.

|

Miklar hreyfingar virðast á fylgi stjórnmálaflokkanna þessa síðustu daga fyrir kosningar. Frá síðustu könnun MMR á fylgi flokka sem birt var í byrjun vikunnar hefur fylgi Vinstri grænna minnkað um tæp 3 prósentustig og mælist flokkurinn nú, síðasta sólarhringinn, með 16,6% fylgi. Fylgi Framsóknarflokksins hefur aftur á móti farið vaxandi frá síðustu mælingu og mældist nú 11,7% borið saman við 8,6% í síðustu könnun. Sjálfstæðisflokkurinn mælist nú með 21,3% fylgi en mældist 22,9% í síðustu könnun.

|

Sjálfstæðisflokkurinn mælist nú með stuðning 22,9% kjósenda. Vinstri græn koma þar á eftir með 19,9% - munurinn á flokkunum mælist þó innan vikmarka. Gagnaöflun stóð yfir dagana 20. til 23. október 2017.

Bæði Vinstri græn og Sjálfstæðisflokkurinn hafa bætt við sig fylgi frá síðustu mælingu MMR sem lauk 18. október 2017 en þá mældist Sjálfstæðisflokkurinn með 19,9% og Vinstri græn með 19,1% fylgi. Fylgi Samfylkingar minnkar aftur á móti á milli mælinga og er nú í 13,5%, samanborið við 15,8% í síðustu mælingu. Jafnframt fækkar fylgjendum Pírata á milli mælinga og mældust nú 9,3% en mældust 11,9% í síðustu könnun.

|

Þeim Íslendingum sem búa í leiguhúsnæði hefur fækkað um 3,5% á síðastliðnum 12 mánuðum. Á móti hefur þeim sem búa í foreldrahúsum fjölgað um tæp 2 prósentustig. Þannig sögðust 18,3% búa í leiguhúsnæði nú samanborið við 21,8% árið 2016 og 10,0% bjuggu í foreldrahúsum samanborið við 8,1% árið 2016. Þá sögðust 69,9% búa í eigin húsnæði sem er aukning um 1 prósentustig frá síðustu mælingu MMR.

|
Síða 5 af 23
Almennt um birtar niðurstöður kannana MMR
MMR birtir reglulega niðurstöður úr könnunum sem unnar hafa verið meðal almennings um málefni líðandi stundar. Kannanirnar eru jafnan unnar sem hluti af spurningavagni MMR og efnistök valin af starfsfólki MMR út frá þeim fréttum sem eru áberandi í umfjöllun þegar viðkomandi könnunin hefst. MMR birtir ekki fréttatilkynningar úr könnunum sem eru unnar fyrir aðra eða fjármagnaðar af öðrum. Kannanir MMR eru unnar samkvæmt siðareglum ESOMAR.
 
Notkun á efni heimil svo lengi sem heimilda (vörumerkis MMR) er skýrt getið í heimildum um uppruna gagnanna.
Allur réttur áskilinn: 2006 © Markaðs- og miðlarannsóknir ehf.
MMR er skrásett vörumerki Markaðs og miðlarannsókna ehf.