Álitsgjafar MMR er hópur fólks sem hefur samþykkt að fá sendar kannanir í tölvupósti sem þeir svara á Internetinu. Álitsgjöfum er einnig boðið að taka þátt í ýmiskonar öðrum rannsóknarverkefnum (s.s. umræðuhópum eða einstaklingsviðtölum) þar sem leitast er við að öðlast dýpri skilning á viðhorfum fólks til markaðs- og samfélagsmála. Með því að gerast Álitsgjafi MMR hefur fólk því bein áhrif á hvernig vörur og þjónusta þróast í framtíðinni.

Hér að neðan finnur þú svör við algengum spurningum sem við fáum frá Álitsgjöfum MMR vegna þátttöku þeirra í könnunum.

Spurningar og svör

Hvað felur það að vera Álitsgjafi í sér?
Sem Álitsgjafi færð þú af og til sendan tölvupóst með boði um þátttöku í könnun um samfélags- og/eða markaðsmál. Tíðni kannana fer eftir þáttum svo sem aldri og kyni en yfirleitt ekki oftar en tvisvar í mánuði (og oftast færri). Viðhorf Álitsgjafa hafa bein áhrif á vöruframboð og þjónustu fyrirtækja og stofnana. Athugaðu að MMR reynir aldrei að selja neitt og Álitsgjafar fá ekkert greitt fyrir þátttökuna (fyrir utan að þeir eiga möguleika á hóflegum happdrættisvinningi af og til sbr. neðangreint).

Hverjir geta tekið þátt?
Álitsgjafar MMR eru valdir úr Þjóðskrá með tilliti til lýðfræðilegar samsetningar þjóðarinnar á hverjum tíma. Álitsgjafar eru því aldrei sjálfvaldir heldur höfum við sérstaklega samband við fólk og bjóðum því þátttöku.

Hvernig haldið þið trúnaði við Álitsgjafa?
MMR starfar samkvæmt ströngum siðareglum ESOMAR (alþjóðasamtökum markaðsrannsóknafyrirtækja). MMR lætur aldrei af hendi persónugreinanlegar upplýsingar þátttakenda. Allar niðurstöður kannana eru settar fram með þeim hætti að tiltekin svör verða aldrei rakin til einstakra svarenda. Komi persónugreinanlegar upplýsingar fram við gagnaöflun eru þær jafnframt skildar frá gögnum að könnun lokinni.

Hvað geri ég ef ég fæ nýtt tölvupóstfang?/Hvernig get ég haft samband við ykkur?
Ef þú vilt breyta tölvupóstfanginu þínu eða fá svar við fyrirspurn þá sendir þú póst á This email address is being protected from spambots. You need JavaScript enabled to view it..
Athugaðu að ef þú ert að breyta póstfangi þá þarft þú jafnframt að taka fram eldra póstfang.

Það er langt síðan ég fékk síðast senda könnun?
Eruð þið hætt að senda mér kannanir?
Þar sem ólíkar kannanir eiga erindi til ólíkra hópa þá er misjafnt hve oft kannanir eru sendar þátttakendum. Þú ættir þó að fá könnun senda á að minnsta kosti tveggja mánaða fresti. Ef það er ekki að gerast þá gæti verið að við séum með rangt póstfang og værum við þakklát ef þú gætir sent okkur póstfangið þitt aftur (sjá leiðbeiningar um sendingu á póstfangi hér að ofan). Að lokum gæti líka verið að þú hafir verið afskráð(ur) sjálfkrafa ef þú hefur ekki svarað boði um þátttöku í könnun í langan tíma.

Hvernig get ég hætt sem Álitsgjafi?
Í öllum tölvupóstum sem þú færð frá okkur koma fram upplýsingar um hvernig þú getur haft samband við okkur til að afskrá þig eða koma öðrum upplýsingum á framfæri. Afskráning fer fram samstundis.

Hvernig vinninga er boðið upp á fyrir þátttöku í könnunum?
Í flestum könnunum er boðið upp á happdrættisvinning sem er yfirleitt í formi gjafakorts eða vöruúttektar. Vinningsupphæðin tekur mið af lengd könnunarinnar og er yfirleitt á bilinu 5.000-10.000 kr. Undantekningar kunna að vera þegar kannanir eru unnar fyrir aðila svo sem góðgerðarsamtök þá er jafnan ekki boðið upp á vinninga.

Af hverju eru vinningarnir ekki hærri eða fleiri?
Megin ástæðan er sú að við viljum ekki hafa óeðlileg áhrif á svörun fólks. Vinningarnir eru því hugsaðir sem hóflegur þakklætisvottur. Með því að taka þátt í markaðs- og samfélagsrannsóknum eru svarendur aftur á móti að stuðla að bættu vöru- og þjónustuframboði og þannig má segja að allir hlutaðeigandi hagnist á endanum.

Hvernig veit ég hvort ég hef fengið vinning fyrir þátttöku í könnun?
Allir vinningshafar fá sendan tölvupóst með tilkynningu um að þeir hafi unnið.
Vinningaskrá með þátttökunúmerum er jafnframt birt á vefsíðu MMR í hverjum mánuði.

Af hverju birtið þið ekki nöfn vinningshafa á heimasíðunni?
Öllum þátttakendum í könnunum er heitið algerri nafnleynd um þátttöku sína. Það gildir jafnt um svör við einstökum spurningum sem og þátttöku í könnunum yfirleitt.

Hve oft fæ ég sendar kannanir og hve löng er hver könnun?
Fjöldi kannana er breytilegur en búast við allt að tveim könnunum í mánuði (en oftast færri). Lengd kannana er einnig breytileg en flestar kannanir eru á bilinu 4-10 mínútur.

Um hvað fjalla kannanirnar og fyrir hvern eru þær unnar?
MMR vinnur fyrir mjög ólíka aðila, bæði fyrirtæki og stofnanir. Efnistök geta því verið æði ólík, allt frá samfélags- til markaðsmála.

Slóðin sem ég fékk senda virkar ekki. Hvað á ég að gera?
Ef það virkar ekki að smella á slóðina þá hefur hún líklega skipst í tvær línur. Prófaðu að afrita og líma hana í vafrann þinn (copy/paste). Athugaðu að taka ekki með nein tákn sem gætu hafa orðið til milli lína í tölvupóstforritinu þínu (algengt er að tölvupóstforrit setji táknið ">" í upphafi hverrar nýrrar línu).

Tölvupósturinn sem ég fæ með könnunum er ólæsilegur. Hvað veldur?
Í langflestum tilfellum gerist þetta vegna þess að Internet Explorer (eða aðrir vafrar) sýna ekki íslenska stafi rétt. Þetta er hægt að laga samanber eftirfarandi:
Internet Explorer: Veljið View>Encoding og stilla á 'Auto select' eða Unicode (UTF-8).
Firefox: Veljið Skoða > Stafatöflur > Unicode (UTF-8) eða 'Skynja sjálfkrafa/Almennt'.